ᐱᒍᑦᔨᐅᑎᕗᑦ ᐃᑲᔪᕐᓯᐅᑎᕗᓪᓗ ᑰᑦᔪᐊᒥᐅᓄᑦ
ᖄᖏᕐᓂᑯᓕᐅᕐᑏᑦ ᑮᓇᐅᔭᓂᒃ ᐊᑦᑕᕐᑎᑕᐅᒍᓐᓇᓂᖏᑦ
ᖄᖏᕐᓂᑯᓕᐅᕐᑎᓂᒃ ᐊᑦᑕᑐᕐᑎᓯᒍᓐᓇᓂᖅ ᑮᓇᐅᔭᖃᕐᑎᑕᐅᒻᒥᔪᖅ ᑰᑦᔪᐊᒥᐅᑦ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᐊᕐᓂᒧᑦ ᐃᑲᔪᕐᓯᐅᑏᑦ ᐃᓗᐊᒍᑦ ᑮᓇᐅᔭᖃᕐᑎᓯᓲᖑᑦᓱᓂᓗ ᖄᖏᕐᓂᑯᓕᐅᕐᑎᓂᑦ ᑮᓇᐅᔭᖃᕐᑎᑕᐅᒍᓐᓇᕕᓕᓐᓂᒃ 1990 ᐊᕐᕌᒍᖏᑦ ᐱᒋᐊᓯᓚᐅᕐᓯᒪᒻᒪᑕᓂᑦ. ᑮᓇᐅᔭᖃᕐᑎᑕᐅᓂᖅ ᐱᕕᑦᓴᐅᔪᖅ ᖃᓄᐃᑦᑐᑐᐃᓐᓇᓄᑦ ᖄᖏᕐᓂᑯᓕᐅᕐᑎᓄᑦ. ᒪᓕᑦᓱᒋᑦ ᓇᓪᓕᐊᒍᑦ ᑮᓇᐅᔭᖃᕐᑎᑕᐅᒍᒪᓃᑦ, ᖄᖏᕐᓂᑯᓕᐅᕋᓱᐊᕐᑏᑦ ᑐᑦᓯᕋᐅᑎᓕᐅᕐᓯᒪᒋᐊᖃᓲᑦ ᐸᕐᓇᓯᒪᐅᑎᒥᓂᒃ ᐃᓚᖃᕐᑎᓯᓗᑎᒃ ᐊᒻᒪᓗ/ᐅᕝᕙᓘᓐᓃᑦ ᑮᓇᐅᔭᕐᑐᕈᑎᕕᓂᕐᒥᑕ ᐊᓪᓚᖁᑎᖏᓐᓂᑦ.
ᑐᑭᓯᒋᐊᓪᓚᕈᒪᒍᕕᑦ ᖃᐅᔨᒋᐊᕐᕕᖃᕐᓗᑎᑦ ᐊᐅᓚᑦᓯᓂᓕᕆᕕᐅᑉ ᐱᒍᑦᔨᕕᖓᓂᑦ ᐅᕙᓂ 819-964-2625 ᐅᕝᕙᓘᓐᓃᑦ ᑕᑕᕐᓴᒐᖅ ᑕᑕᕐᓴᓗᒍ.
ᑰᑦᔪᐊᑉ ᐄᒐᕐᕕᖓ
ᓄᓇᓕᒻᒥ ᐃᑲᔪᕐᓯᓂᖅ
ᐊᕐᕌᒍᐃᑦ 15 ᐅᖓᑖᓄᑦ ᑰᑦᔪᐊᒥᐅᑦ ᑎᒥᖁᑎᖓ ᐱᑕᖃᕐᑎᓯᓲᖅ ᐅᒥᐊᑦ ᑲᓕᒐᖏᓐᓂᑦ ᑲᓕᑦᓱᑎᒃ ᐅᒥᐊᕐᑐᑎᓂᒃ ᒪᙯᒋᐊᕐᑐᑐᓂᒃ ᐊᑎᕐᑐᓂᓪᓘᓃᑦ. ᐊᐅᓚᑦᓯᓲᖑᒻᒥᔪᒍᑦ ᑰᑦᔪᐊᑉ ᐄᒐᕐᕕᖓᓂᑦ ᐅᒥᐊᒃᑯᕕᓐᓂᑦ ᐊᒻᒪᓗ ᑐᓴᕈᑎᓕᕆᐅᑏᑦ ᓈᓚᐅᑏᑦ ᐊᕐᖁᑎᖏᑦᑕ ᑐᖕᖓᕕᖓᓂᑦ ᒪᙯᑦᑏᑦ ᑐᓴᐅᒪᖃᑎᒌᒍᑎᖏᓐᓂᑦ ᐱᓗᐊᕐᑐᒥ ᐅᐃᒪᓇᕐᓯᔪᖃᕐᐸᑦ.
ᑰᑦᔪᐊᒥᐅᑦ ᑎᒥᖁᖓ ᐱᑕᖃᕐᑎᓯᓲᖑᒻᒥᔪᖅ ᐅᒥᐊᑦ ᓯᖏᑕᐅᕕᖏᓐᓂᑦ ᑭᑭᐊᑦᓴᔭᐅᑦᓱᑎᒃ, ᐅᒥᐊᒃᑯᕕᓐᓂ ᐳᑦᑕᔪᓂᑦ ᓯᓚ ᓈᒻᒪᓯᑐᐊᕐᒪᑦ ᐃᓕᔭᐅᓲᓂᑦ. ᐊᐅᓚᑦᓯᓲᖑᒻᒥᔪᒍᑦ ᐃᒪᕐᒥ ᑕᒻᒪᕇᒃᑯᑎᓂᑦ ᓲᕐᓗ ᑰᒻᒥ ᐃᑯᒪᓂᑦ.
ᑰᑦᔪᐊᒥᐅᑦ ᑎᒥᖁᑎᖓ ᓇᒻᒥᓂᖃᕐᒥᔪᖅ ᐊᐅᓚᑦᓯᓱᓂᓗ ᓯᒃᑭᑕᑲᓪᓚᒥᒃ ᓄᓈᕐᑎᓯᒍᑎᒥᒃ ᓄᓇᓕᒻᒥ ᐱᓇᓱᐊᕐᑕᐅᔪᓂᒃ ᐃᑲᔪᕐᓯᓯᒪᔪᖅ ᐆᑦᑑᑎᒋᓗᒍ ᑰᑦᔪᐊᒥᐅᑦ ᐃᓅᓱᑦᑐᐃᑦ ᒪᙯᕐᕕᖓᓂᑦ ᐊᓯᖏᓐᓂᓗ.
ᐃᒻᒥᒎᓈᕐᑎᑐᑦ ᐃᓄᐃᑦ ᑮᓇᐅᔭᓂᒃ ᐊᑦᑕᑐᕐᑎᑕᐅᒍᓐᓇᓂᖏᑦ
ᐃᒻᒥᒎᓈᕐᑎᑐᑦ ᐃᓄᐃᑦ ᑮᓇᐅᔭᓂᒃ ᐊᑦᑕᑐᕐᑎᑕᐅᒍᓐᓇᓂᖏᑦ ᖄᖏᕐᓂᑯᓕᐅᕐᑎᓂᒃ ᐊᑦᑕᑐᕐᑎᓯᒍᓐᓇᓂᖅ ᑮᓇᐅᔭᖃᕐᑎᑕᐅᒻᒥᔪᖅ ᑰᑦᔪᐊᒥᐅᑦ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᐊᕐᓂᒧᑦ ᐃᑲᔪᕐᓯᐅᑏᑦ ᐃᓗᐊᒍᑦ ᓄᐃᑕᐅᓯᒪᔪᒧᑦ 2008-ᖑᑎᓪᓗᒍ ᐃᓕᖓᑦᓱᓂ ᐃᓚᐅᔫᒍᑎᓕᓐᓄᑦ. ᐱᒍᑦᔨᐅᑎᒃ ᓄᐃᑕᐅᕐᖄᓯᒪᔪᖅ ᐃᑲᔪᕐᓯᐅᑎᐅᓂᐊᕐᑎᓗᒍ ᓂᐅᕕᕐᓂᒧᑦ ᒪᙯᓯᐅᑎᓂᒃ ᐱᐅᒃᑯᑎᓂᑦ ᓯᑭᑑᓂᒃ, ᖄᓐᑕᓂᒃ, ᖃᔭᕆᐊᕐᓂᒃ ᕿᐊᕐᖑᔫᓂᓪᓗ. ᐅᓪᓗᒥ, ᐊᒥᓱᐃᑦ ᐊᑦᔨᒌᖕᖏᑐᑦ ᑮᓇᐅᔭᑎᒍᑦ ᐃᑲᔪᕐᓯᐅᑏᑦ ᐱᑕᖃᕐᖁᑦ ᓲᕐᓗ ᓇᒻᒥᓂᖅ ᐃᓪᓗᓕᐅᕈᒪᔪᓄᑦ.
ᑮᓇᐅᔭᑎᒍᑦ ᑲᑕᑦᓯᒪᔪᖃᖕᖏᑲᓗᐊᕐᒪᖔᑦ ᖃᐅᔨᓴᕐᓃᑦ ᐊᑑᑎᔭᐅᓲᑦ Equifax Credit Bureau-ᑯᓄᑦ. ᑰᑦᔪᐊᒥᐅᑦ ᓇᒻᒥᓂᖅ ᓄᐃᑦᓯᓯᒪᒻᒥᔪᑦ ᐊᑦᑕᑐᕐᑏᑦ ᐊᑭᓕᑦᓭᔭᑦᓯᐊᓲᖑᒐᓗᐊᕐᒪᖔᑕ ᖃᐅᔨᓴᐅᑎᒥᒃ.
ᑖᓐᓇ ᐱᒍᑦᔨᐅᑎᒃ ᐱᑦᓯᐊᑐᒻᒪᕆᖅ ᐃᑲᔪᕐᓯᐅᑎᐅᑦᓱᓂ ᑮᓇᐅᔭᓂᒃ ᐃᓚᐅᔫᖁᑎᒥᓄᑦ ᐅᑎᕐᕕᐅᓯᐊᓲᖑᑦᓱᓂᓗ ᕿᑐᕐᖏᐅᑐᓂᒃ ᐊᑦᑕᓀᓕᑎᑦᓯᒍᑎᐅᔪᓂᑦ ᓯᕗᓂᑦᓴᕗᑦᑕ ᑮᓇᐅᔭᖃᕐᕕᒋᖃᑦᑕᓂᐊᕐᒪᐅᒃ.
ᐅᑎᕐᕕᐅᒍᒪᐅᑏᑦ ᓯᖁᒥᓯᒪᔪᓄᑦ ᓱᓇᑐᐃᓐᓇᓄᑦ ᓇᒻᒥᓂᕆᔭᐅᔪᓄᑦ
ᐅᑎᕐᕕᐅᒍᒪᐅᑏᑦ ᓯᖁᒥᓯᒪᔪᓄᑦ ᓱᓇᑐᐃᓐᓇᓄᑦ ᓇᒻᒥᓂᕆᔭᐅᔪᓄᑦ ᐱᑕᖃᕐᑎᑕᐅᔪᖅ ᑰᑦᔪᐊᒥᐅ ᐊᖏᖃᑎᒌᒍᑎᖓᑕ ᐊᕕᑦᑐᓯᒪᓂᐅᑉ 6 ᐃᓗᐊᓂ (1998). ᐅᑎᕐᑎᓯᕕᐅᒍᓐᓇᑎᑕᐅᔪᑦ ᑕᑕᕐᓴᒐᕐᒥᒃ ᑐᓂᓯᒍᓐᓇᑐᑦ ᓯᖁᒥᔨᐊᖃᕐᓯᒪᒍᑎᒃ ᓱᓇᑐᐃᓐᓇᒥᒃ ᓇᒻᒥᓂᕐᒥᓂᒃ ᓲᕐᓗ ᕿᐊᕐᖑᔫᑦ ᐊᒻᒪᓗ ᐊᖑᐊᒍᑏᑦ. ᓯᖁᒥᑦᑐᕕᓂᐅᒋᐊᖃᕐᒥᔪᐃᑦ ᐃᒃᑲᑐᒥᒃ ᐊᐅᓚᔪᕕᓂᐅᒍᑎᒃ ᑭᓯᐊᓂ ᓱᕐᕋᑕᐅᓯᒪᓂᖓᓄᑦ ᑲᓂᐊᐱᔅᑲᐅ ᑰᖓᑕ ᓴᖑᑎᑕᐅᓯᒪᓂᖓᓄᑦ 1981-ᖑᑎᓪᓗᒍ.
ᐅᑎᕐᕕᐅᒍᒪᐅᑎᓄᑦ ᑕᑕᕐᓴᒐᖅ ᑐᓂᔭᐅᒋᐊᓕᒃ ᐊᑐᓂᑦ ᓯᖁᒥᑦᑐᓄᑦ ᓱᕐᖁᐃᑕᐅᓛᕐᑎᓗᒍ ᐅᓪᓗᐃᑦ 30 ᐊᓂᒍᕐᐸᑕ ᑰᑦᔪᐊᒥᐅᑦ ᑎᒥᖁᑎᖓᓄᑦ. ᓯᖁᒥᑦᑐᕕᓃᑦ ᑭᓯᐊᓂ ᑰᑉ ᐃᓗᐊᓄᑦ ᐃᑎᕆᐊᕐᕕᖓᓂᑦ ᓇᐅᑦᓯᑐᕐᑕᐅᓲᑦ.
ᓄᓇᓕᐅᑉ ᑐᓴᐅᑎᖓ
CKUJ-FM ᓄᓇᓕᐅᑉ ᑐᓴᐅᑎᖓ ᓈᓚᐅᑎᐅᑉ ᐊᕐᖁᑎᖓ 97.3 ᑰᑦᔪᐊᖅ, ᑯᐯᒃ ᑲᓇᑕ
ᑰᑦᔪᐊᒥᐅᑦ ᑎᒥᖁᑎᖓᓄᑦ ᓇᒻᒥᓂᕆᔭᐅᔪᖅ. ᖃᐅᔨᒪᔭᐅᖕᖏᑐᖅ ᑐᓴᐅᑎᒃ ᓇᑭᑦ ᓈᓚᐅᑎᖃᕈᓐᓇᐅᑎᒥᒃ ᐱᑖᓚᐅᕐᓂᒪᖔᑦ, ᕋᓗᐊᕐᑎᓗᒍ, CKUJ ᓈᓚᐅᑎᐅᑉ ᐊᕐᖁᑎᖓᓂᑦ 90.1 ᐱᒋᐊᕐᕕᖃᕐᖄᓯᒪᔪᖅ ᐊᓯᑦᔨᔭᐅᖕᖏᓂᕐᒥᓂᑦ 1991-ᖑᑎᓪᓗᒍ. ᑐᓴᐅᑎᒃ ᑰᑦᔪᐊᑉ ᓄᓇᓕᖓᓂᑦ ᐱᑐᑦᓯᒪᑎᑦᓯᔪᖅ ᑐᓴᐅᒪᔭᐅᒋᐊᓖᑦ ᐱᒻᒪᕇᑦ ᑐᓴᕐᑎᓯᒍᑎᐅᓲᖑᒻᒪᑕ ᐅᓪᓘᑉ ᐃᓗᐊᓂ ᐱᓇᓱᓐᓇᐅᑎᓪᓗᒍ. ᐊᒻᒪᓗ, ᑐᓴᐅᑎᒃ ᐊᑐᕐᑕᐅᓲᖑᒻᒥᔪᖅ ᓂᕈᐊᕐᑕᐅᒍᒪᐅᑎᒥᓂᒃ ᐅᖄᕕᐅᒋᐊᕐᑐᓱᓂ ᐊᒻᒪᓗ ᐱᖕᑰᕐᓂᒥᒃ ᐅᖃᕐᑎᓯᕕᖃᕐᕕᐅᓲᖑᑦᓱᓂ ᐱᓇᓱᐊᕈᓯᐅᑉ ᐃᓗᐊᓂ ᒪᕐᕈᕕᑦᑐᒥᒃ. ᑐᓴᐅᑎᑦᓯᒍᑎᑦᓯᐊᖅ ᐊᒥᓱᓂᑦ ᐃᓄᓐᓂᒃ ᑎᒥᐅᔪᓂᓪᓗ ᓄᓇᓕᒻᒥ. ᖃᐅᔨᒋᐊᓪᓚᕈᒪᒍᕕᑦ, ᑐᓴᐅᑎᕐᑎ ᐅᖄᓚᕕᒋᒍᓐᓇᑌᑦ ᐅᕙᓂ 819-964-2921.
ᑲᑎᒪᕖᑦ
ᑲᑎᒪᕖᑦ ᐊᑐᐃᓐᓇᐅᔪᑦ ᐊᑦᑕᑐᐊᕆᔭᐅᒍᓐᓇᓱᑎᒃ
ᒥᑭᔪᖅ ᑲᑎᒪᕕᒃ ᐊᑭᖃᖕᖏᑐᒥᒃ ᐱᑐᑦᓯᒪᐅᑎᒃᑰᕈᑎᖃᕐᓱᓂ / ᐊᑭᓐᓇᒥᒃ ᐊᑦᔨᖑᐊᓂᒃ ᓄᐃᑕᑎᑦᓯᒍᑎᒃ ᐊᑭᓐᓇᒥᐅᑕᖓᓗ ᐱᑕᓕᒃ ᐊᒻᒪᓗ ᑰᑦᔪᐊᑉ ᓄᓇᓕᖓ ᑕᑯᒥᓇᕐᑐᖅ ᑕᑯᑦᓴᐅᓱᓂ ᑕᒡᒐᖓᑦ
ᐱᖕᖑᐊᕕᒃ ᐊᑦᑕᑐᕐᑕᐅᒍᓐᓇᑐᖅ ᖃᓄᐃᑦᑐᑐᐃᓐᓇᓄᑦ ᐱᓂᐊᕐᓂᐅᔪᓄᑦ ᑲᑎᒪᓂᒻᒪᕆᓐᓄᓘᓐᓃᑦ ᖃᓂᖕᖒᑎᖃᕐᓱᓂ, ᓵᑦ ᐃᑦᓯᕙᐅᑌᓪᓗ ᐱᑕᖃᕐᒥᔪᑦ ᐊᑐᕐᑕᐅᒋᐊᖃᕐᐸᑕ. ᓂᕿᖃᕐᑎᓯᔨᐅᔪᓂᑦ ᐅᓐᓂᑑᑦᔨᒍᓐᓇᒥᔪᒍᑦ ᑭᖕᖒᒪᒋᔭᐅᑉᐸᑕ.
ᖃᖓᑐᐃᓐᓇᑯᑦ ᑐᑦᓯᕋᐃᕕᐅᒍᓐᓇᑐᒍᑦ ᑭᖕᖒᒪᑦᓯᒍᑦᓯ ᐱᓂᐊᕐᓂᐅᒐᔭᕐᑐᒧᑦ.
ᐅᖄᓚᕕᒋᓗᒍ ᔦᓴᓐ ᐁᑦᓯᓴᓐ ᐅᕙᓂ 819-964-2625 ᐅᕝᕙᓗᓐᓃᑦ ᑕᑕᕐᓴᒐᖅ ᑕᑕᕐᓴᓗᒍ ᐊᑭᖏᑦ ᖃᑦᓯᕌᕐᒪᖔᑕ ᑕᑯᓚᖓᒐᕕᑦ.
ᐱᖕᖑᐊᓚᐅᕐᑕ!
ᐱᖕᖑᐊᓚᐅᕐᑕ! ᐱᖕᖑᓚᐅᕐᑕ ᐱᐊᕋᕐᓂᒃ ᐅᑭᐅᓕᓐᓂᒃ 0-6 ᐃᓚᒌᓂᓪᓗ ᐱᕕᖃᕐᑎᓯᓲᖑᒻᒥᔪᖅ. ᐊᑕᐅᓯᕕᖕᖏᑐᒥᒃ ᐱᓇᓱᐊᕈᓯᐅᑉ ᐃᓗᐊᓂ ᑲᑎᓲᖑᔪᒍᑦ ᐅᓪᓛᑯᑦ ᐊᒻᒪᓗ ᐱᓇᓱᐊᕈᓯᐅᑉ ᓄᖕᖑᐊᓂ ᖁᓛᓃᑦᑐᒥᒃ ᖄᑭᕐᑏᑦ ᑲᑎᒪᕕᖓᓂᑦ. ᑖᓐᓇ ᐱᒍᑦᔨᐅᑎᒃ ᐃᓚᖃᕐᑐᖅ ᓴᐳᑦᔨᐅᑎᓂᒃ ᐱᕈᕐᐸᓕᐊᓂᕐᒧᑦ ᐊᒻᒪᓗ ᖃᓄᐃᖕᖏᓯᐊᕐᑐᓂᒥᒃ ᐃᓅᖃᑎᖃᕈᓐᓇᓂᕐᒧᑦ ᐃᓕᓐᓂᐊᑎᑦᓯᒍᑎᓂᒃ, ᐱᓂᐊᕐᓂᖃᕐᑎᓯᓂᕐᒥᒃ ᓯᓚᒦᑦᑎᓯᓂᒃᑯᑦ, ᐅᓂᒃᑳᑐᐊᕐᕕᖃᕐᓂᑯᑦ, ᓂᑦᔭᓗᑦᑖᑎᓂᓪᓗ ᙯᑎᑦᓯᓂᒃᑯᑦ ᖃᔪᖏᕐᓭᒍᑎᐅᑎᓪᓗᒋᑦ ᐃᓗᕐᖁᓯᕐᒨᓕᖓᔪᑦ, ᐊᑦᔨᒌᖕᖏᑐᐃᑦ ᐱᖕᖑᐊᓃᑦ ᐱᐊᕋᕐᓂᒃ ᐃᓕᓐᓂᐊᑎᑦᓯᒍᑎᑦ ᑎᒥᒥᓂᒃ ᐊᐅᓚᑦᓯᒋᐅᕐᓴᓂᕐᒧᑦ ᐃᙯᓕᓴᕐᓂᒥᓪᓗ ᓱᖏᐅᓯᓭᓂᕐᒥᒃ ᐊᒻᒪᓗ ᓴᐳᒻᒥᓂᒃᑯᑦ ᐊᖓᔪᕐᖄᕆᔭᐅᔪᓂᒃ ᐱᐊᕋᕐᓄᑦ ᐃᓕᓐᓂᐊᕆᐊᖕᖓᓛᓕᕐᑐᓄᑦ ᖃᓄᐃᓘᕐᓗᑎᒃ ᐃᑲᔪᕐᓯᒪᒍᓐᓇᒪᖔᒻᒥᒃ ᕿᑐᕐᖓᒥᓂᒃ ᐊᓂᕐᕋᒥᓂᑦ ᐱᖕᖑᐊᓂᒃᑯᑦ ᐃᓕᓐᓂᐊᑎᑦᓯᖃᑦᑕᓗᑎᑦ. ᐃᓚᓐᓈᑖᕆᔭᐅᒋᑦ ᐱᖕᖑᐊᓚᐅᕐᑖᑯᓐᓄᑦ
